“Borçalı folkloru: problemlər və görüləsi işlər”
9 noyabr 2009-cu il tarixində AMEA Folklor İnstitutunun direktoru, filologiya elmləri doktoru Hüseyn İsmayılovla Milli Azlıqların Hüquq Müdafiə Monitorinq Qrupunun sədri, hüquq müdafiəçisi Elbrus Məmmədov və institutun əməkdaşları filologiya elmləri namizədi S.Rzasoy, hüquqşünas S.Vəkilov və digərlərinin iştirakı ilə görüş keçirilmişdir. Tədbirdə Borçalı və ümumilikdə Gürcüstan Respublikasında yaşayan azərbaycanlıların yaşatdığı folklor nümunələrinin toplanılması və nəşri sahəsində görülə biləcək işlər barəsində müzakirələr aparılmışdır.
Müzakirədə çıxış edən filologiya elmləri doktoru Hüseyn İsmayılov bildirmişdir ki, Gürcüstan Respublikasında yaşayan azərbaycanlıların folklor nümunələrinin mükəmməl şəkildə toplanılaraq çap olunması bu günümüz üçün aktual məsələlərdəndir. Həmçinin Milli Azlıqların Hüquq Müdafiə Monitorinq Qrupunun sədri, hüquq müdafiəçisi Elbrus Məmmədov bu gün Gürcüstan Respublikasında yaşayan azərbaycanlıların zəngin mədəni ənənələri canlı şəkildə yaşatmasını vurğulayaraq bu sahədə görüləsi işlərin kifayət qədər çox olduğu qənaətində olduğunu söyləmişdir.
AMEA Folklor İnstitutunun Mətbuat Katibi Hikmət Quliyev |