AMEA Folklor İnstitutu Qarabağla bağlı folklor materiallarının toplanılmasını genişləndirəcək
Azərbaycan Milli Elmlər Akademiyasının (AMEA) Folklor İnstitutu folklor materiallarının yeni şəkildə toplanılması, sistemləşdirilməsi və nəşrini həyata keçirəcək. İnstitutun direktoru Muxtar İmanov APA-ya açıqlamasında bildirib ki, ilk növbədə Qarabağ bölgəsi ilə bağlı folklor materiallarının daha da zənginləşməsinə ehtiyac var: “Qarabağ bölgəsində elə rayonlar var ki, ora bir folklorşünasın belə ayağı dəyməyib. Buna görə də Qarabağ bölgəsi ilə bağlı folklor materiallarının toplanılması, sistemləşdirilməsi və nəşri layihəsini həyata keçirməyə ehtiyac böyükdür. Xüsusən də məcburi köçkünlərin kompakt yaşadığı bölgələrdə bu işlər həyata keçirilməlidir. Etnos bir yerdən başqa yerə köçəndə onun mühitində də fərqlər yaranır. Kəlbəcərdən olan insanlar orada dedikləri nağılları, oyun və mərasimləri, dastanları məskunlaşdıqları yerdə demək istəyirlərmi? Bu da artıq tədqiqatçılar üçün araşdırma mövzusudur”.
M. İmanov qeyd edib ki, analoji layihələr daha sonra Azərbaycanda yaşayan azsaylı xalqların folklorunun toplanılması ilə bağlı da həyata keçiriləcək. |