AMEA Folklor İnstitutunda Xocalı soyqırımı anıldı
Bu gün AMEA Folklor İnstitutunda Xocalı soyqırımı anıldı. Mərasimi giriş sözü ilə açan Folklor İnstitutunun direktoru f.e.d., prof. Hüseyn İsmayılov Xocalı soyqırımının dünya tarixində çox az rast gəlinən qırğınlardan biri olduğunu vurğuladı. O həm də qeyd etdi ki, Xocalıda amansızcasına törədilmiş bu qətliyam təkcə Azərbaycan türklərinə deyil, bütövlükdə türk dünyasına qarşı yönəlmiş erməni vandalizminin bariz nümunəsidir.
Bundan sonra çıxış edən f.e.n Elxan Məmmədli deyib ki, ermənilərin bu kimi əməlləri təkcə Xocalıda deyil, Qaradağlıda da olub. Həmçinin o çıxışında bildirib ki, türklər dünyada heç bir millətə qarşı nifrət bəsləməyiblər. Lakin ermənilər o qədər naxələfliklər ediblər ki, hətta folklor yaddaşında da onlar həmişə mənfi kimi xarakterizə olunublar.
Tədbirdə çıxış edən şair Adil Cəmil tariximizin qara səhifəsi olan bu hadisədən ibrət dərsi almağın vacib olduğunu söyləyib. Eyni zamanda, şair Adil Cəmil Xocalı uğrunda son damla qanına kimi vuruşan oğulların, başda Milli Qəhrəman Əlif Hacıyev olmaqla Azərbaycan xalqının yaddaşında daim yaşayacağını vurğuladı.
Daha sonra çıxış edən Elçin Qaliboğlu Xocalı soyqırımına ümumbəşəri dəyərlər kontekstində baxaraq bu hadisənin insanlıq üçün alçaldıcı olduğunu deyib. O bildirib ki, dünyanın xəlqiliyi, ruhaniliyi, mənəviyyatı korlanıb. Bu gün Xocalı soyqırımının dünyada ədalətli qiymətini almaması yüksək dəyərlərdən danışan dünyanın iç üzünü açıb ortaya qoyur.
Tədbirdə son sözlə çıxış edən prof. Hüseyn İsmayılov bildirdi ki, çox sevindiricidir ki, bu gün dövlətimiz Xocalı soyqırımının ədalətli qiymətini alması, bu soyqırımı törədənlərin dünyaya tanıdılması sahəsində mühüm işlər görməkdədir.
AMEA Folkor İnstitutunun Mətbuat Katibi Hikmət Quliyev |