11.11.2014
“Bakı Elm Festivalı – 2014”
![](images/10-11-2014-elmfestival2.jpg) Noyabrın 10-da “Bakı Elm Festivalı – 2014” öz işinə başlayıb. Festival Azərbaycan Milli Elmlər Akademiyasının (AMEA) təşkilatçılığı, Bakı Şəhər İcra Hakimiyyəti və Təhsil Nazirliyinin dəstəyi ilə həyata keçirilir.
Məqsəd elm və cəmiyyəti, eləcə də elmin müxtəlif sahələrini bir-birinə yaxınlaşdırmaq, elmi nailiyyətləri nümayiş etdirmək, gənc nəslin bu sahəyə marağını artırmaqdır.
Açılış mərasimində AMEA-nın prezidenti, akademik Akif Əlizadə çıxış edərək deyib ki, bu gün Azərbaycan elmi böyük potensiala malikdir: “Elmimizin xeyli nailiyyətləri var. Festivalın keçirilməsi Azərbaycan elminin gələcək inkişafına dəstək verəcək, bu sahədə uğurların artmasına imkan yaradacaq”.
![](images/10-11-2014-festival1.jpg)
A.Əlizadə bu festivalın Azərbaycan elmində kadr hazırlığına da böyük töhfə olacağını vurğulayıb. AMEA-nın prezidenti Azərbaycanda elmin və təhsilin inkişafına göstərilən qayğıdan, Akademiyanın bir sıra dövlət qurumları ilə əməkdaşlıq çərçivəsində həyata keçirilən layihələrindən, alimlərin elmi tədqiqatlarından da bəhs edib. Bildirilib ki, elm festivalı çərçivəsində bir sıra tədbirlər keçiriləcək, AMEA-nın Milli Azərbaycan Tarixi, Arxeologiya və Etnoqrafiya Muzeylərinə ekskursiyalar təşkil ediləcək.
Digər çıxış edənlər də elmə marağın artırılmasında festivalın mühüm rolu olacağına əminliklərini bildiriblər.
![](images/10-11-2014-festival14.jpg)
![](images/10-11-2014-festival16.jpg)
|