“Ortaq türk keçmişindən ortaq türk gələcəyinə” beynəlxalq folklor konfransının materialları işıq üzü gördü

Azərbaycan elmi ictimaiyyəti artıq sayca altıncı olan “Ortaq türk keçmişindən Ortaq türk gələcəyinə” adlı beynəlxalq folklor konfransının astanasındadır. Artıq konfransın keçirilməsi üçün lazım olan şərtlər həyata keçirilmişdir.
Hər il olduğu kimi, bu il də AMEA Folklor İnstitutu öz ənənəsinə sadiq qalaraq konfransın materialları toplanılmış möhtəşəm kitabı geniş oxucu kütləsinin ixtiyarına vermişdir.
Təməli ümummilli liderimiz Heydər Əliyev tərəfindən qoyulmuş Foklor İnstitututu milli-mənəvi dəyərlərin qorunması ideyasını yarandığı ilk gündən öz fəaliyyəti üçün prioritet götürmüş və Azərbaycan Respublikasının prezidenti cənab İlham Əliyevin Milli Təhlükəsizlik Konsepsiyasının müddəalarını diqqət önündə saxlayaraq bu istiqamətdə ixtisaslaşmışdır.
Artıq işıq üzü görmüş “Ortaq türk keçmişindən ortaq türk gələcəyinə” VI Uluslararası folklor konfransının materalları bir sıra ölkə alimlərinin məqalə və tezislərini əks etdirir. Belə ki, topluda Türkiyə, Rusiya, KKTC, Ukrayna, Qazaxıstan, İran, Gürcüstan və s. ölkələrdən iştirak edən alim və tədqiqatçıların məqalələri yer almışdır.
Ümumilikdə, 500 səhifədən çox olan “Materiallar”da türk dünyasının bir sıra görkəmli alimlərinin məruzələri vardır ki, bu da əldə olunmuş elmi nətcələrin bölüşdürülməsində mühüm əhəmiyyət kəsb edir. Ayrı-ayrı ölkələrdə müxtəlif alimlər tərəfindən aparılmış bu tədqiqatlar əgər bir tərəfdən elmi mübadiləyə imkan verirsə, digər bir tərəfdən milli-mənəvi keçmişimizi öyrənmək baxımından vacibdir.
AMEA Folklor İnstitutunun direktoru, f.e.d., prof. Hüseyn İsmayılovun birbaşa rəhbərliyi və səyi nəticəsində “Materialların” konfrans keçiriləcək tarixə qədər çap olunub işıq üzü görməsi ənənəsi bir daha təmin edildi. Bununla konfrans materiallarının bir sıra ölkə elmi ictimaiyyətinə çatdırılması istiqamətində mühüm addım atıldı.

AMEA Folklor İnstitutunun Mətbuat Katibi Hikmət Quliyev