Əməkdaşlarımız Türk dünyasının mədəniyyət paytaxtında oldular

Rusiya Federasiyası Tatarıstan Respublikası Kazan (Volqaboyu) Federal Universiteti Filoloji və Mədəniyyətlərarası Əlaqələr İnstitutu 14-18 may 2014 - cü il tarixdə “Türk xalqlarının bədii mədəniyyəti və ədəbiyyatı Şərq-Qərb kontekstində” adlı beynəlxalq elmi konfrans təşkil edib. Konfransın gündəliyinə türk xalqları folkloru, bədii mətn, üslub və struktur, türk xalqları ədəbiyyatı, mədəniyyəti, dili və tarixi, Şərq və Qərb ədəbiyyatlarının təsirlənmə istiqamətləri və s. məsələlər daxil edilib. Konfrans Tatarıstan Respublikasının və 2014-cü il üçün Türk dünyasının mədəniyyət paytaxtı Kazan şəhərində keçirilib.
Konfransa Azərbaycandan AMEA Folklor İnstitutunun direktoru Muxtar Kazımoğlu, həmin institutun şöbə müdiri Ağaverdi Xəlil və böyük elmi işçi Qalib Sayılov dəvət olunmuşdu. Konfransın proqramına Muxtar Kazımoğlunun “Folklorda obrazın ciddi yöndə ikiləşməsi kontekstində libasdəyişmə və addəyişmə”, Ağaverdi Xəlilin “Oğuz eposunda arxaik aydım janrı”, Qalib Sayılovun “Atalar sözlərində dini görüşlərin semantik xüsusiyyətləri” mövzusundakı məruzələri daxil edilmişdi. Folklor İnstitutunun direktoru Muxtar Kazımoğlu konfransa təbrik məktubu göndərib. Təbrik məktubu konfransın açılış mərasimində oxunub. Məktubda konfransın elmi-mədəni əhəmiyyəti vurğulanıb və onun işinə uğur arzulanıb. Təşkilat komitəsi adından AMEA Folklor İnstitutunun direktoru Muxtar Kazımoğluna və onun rəhbərlik etdiyi instituta türk xalqlarının ənənəvi mədəniyyətinin qorunmasında, öyrənilməsində və təbliğində göstərdiyi xidmətlərə görə təşəkkür edilib.
Konfransın materialları elmi məqalələr toplusunda İSBN, UDK, BBK kodları verilməklə çap olunub, Rusiya Federasiyasının mərkəzi kitabxanalarına verilib və Rusiya Kitab evində qeydiyyata alınıb.