5.3.2014 Əməkdaşımıza Türkmənistan Elmlər Akademiyasından dəvət
![](images/turkmenistan.jpg)
AMEA Folklor İnstitutunun Mərasim folkloru şöbəsinin müdiri Ağaverdi Xəlil 2014-cü ilin mart ayının 10-dan 14-dək Türkmənistanda keçiriləcək “Cənub şərqi Türkmənistanın irsi qədim və orta əsrlər Avrasiya mədəniyyəti kontekstində” adlı beynəlxalq elmi konfransa dəvət olunmuşdur.
Dünyanın bir çox ölkələrinin elm adamlarının iştirakını nəzərdə tutan bu Beynəlxalq elmi konfransın proqramına Ağaverdi Xəlilin “Orta əsrlər dövrü oğuz türklərinin mərasim mədəniyyəti” (“Məcməül əmsali Məhəmmədəli” “Oğuznamə”sinin materialları əsasında) mövzusunda məruzəsi də daxil edilmişdir.
Beynəlxalq konfrans Türkmənistan prezidenti Qurbanqulu Berdımuxamedovun 4 oktyabr 2013-cü il tarixli 13241 saylı sərəncamına uyğun olaraq Türkmənistan Elmlər Akademiyası tərəfindən təşkil edilmişdir. Konfransın açılış mərasimi mart ayının 10-da Türkmənistanın paytaxtı Aşqabad şəhərində olacaq, mart ayının 12-i və 13-də öz işini Milli turistik bölgə olan Avazada davam etdirəcəkdir. Konfransda aşağıdakı elmi istiqamətlər üzrə məruzələr dinləniləcəkdir:
1.Qüdrətlilik və xoşbəxtlik dövründə Türkmənistanın mədəni irsi.
2.Cənub şərqi Türkmənistanın maddi və mənəvi mədəniyyəti və Böyük İpək yolu.
3.Cənub şərqi Türkmənistanın tarixi-arxeoloji abidələri və onların elmi şəkildə öyrənilməsi.
4.Cənub şərqi Türkmənistanın etnoqrafik irsi və reqional tarixi-mədəni əlaqələr.
Konfransın işlək dilləri türkmən, ingilis və rus dilləridir.
|