Əməkdaşlarımız Başqırdstan Dövlət Universitetində oldular

Başqırdstan Dövlət Universiteti Rusiya Federasiyası Başqırdstan Respublikasının Sterlitamak şəhərindəki filialında 2013-cü ilin dekabr ayının 16-dan 19-dək “Başqırd və türk filologiyasının öyrənilməsi və tədrisi problemləri” mövzusunda Beynəlxalq elmi konfrans keçirdi.Konfransın keçirilməsində məqsəd türk xalqları filologiyasının aktual problemlərini müəyyənləşdirmək və onların həlli yollarını araşdırmaqdan ibarət idi.Konfrans Başqırdstan Dövlət Universitetində başqırd filologiyasının fakültə olaraq əsasını qoymuş professor, Rusiya sosial və pedaqoji elmlər akademiaysının müxbir üzvü Bulat Baki oğlu Qafarovun (1938-2003) anadan olmasının 75 illiyinə həsr olunmuşdu.
Konfransda MDB ölkələrindən (Azərbaycan, Kazaxstan, Ukrayna) və Rusiya Federasiyasının müxtəlif yerlərindən (Altay, Başqırdstan, Çuvaşıstan, Yakutstan, Udmurtustan, Çelyabinsk) elm adamları iştirak edirdilər. Konfransın proqramına 180 məruzə daxil edilmişdi. Məruzələrdə doğma dillərin tədrisinin perspektiv mövzuları, dilçilik və ədəbiyyatşünaslığın fundamental və tətbiqi problemləri, dil, cəmiyyət və mədəniyyətin qarşılıqlı əlaqələrinin aktual problemləri araşdırılırdı. Azərbaycan Milli Elmlər Akademiyası Folklor İnstitutunun Mərasim folkloru şöbəsinin müdiri Ağaverdi Xəlil və həmin şöbənin böyük elmi işçisi Qalib Sayılov konfransın işində iştirak etmiş və maraqlı məruzələr etmişlər. Ağaverdi Xəlil konfransın açılış iclasında çıxış etmiş, türk xalqlarının dillərinin, folklorlarının, ədəbiyyatlarının, bütövlükdə qeyri-maddi mədəni irsin qorunmasının, öyrənilməsinin və gələcək nəsillərə itkisiz və zədəsiz çatdırılmasının vacibliyindən bəhs etmiş, türk xalqlarının humanitar elmlərinin, o cümlədən türk filologiyasının qarşısında duran vəzifələri aydınlaşdırmışdır.

Açılış iclasındakı çıxışlardan sonra konfrans bölmələrdə davam etdirilmişdir. Folklor bölməsindəki iclasda Ağaverdi Xəlil “Azərbaycan xalq nağıllarında sudan keçid ritualının rudimentləri” mövzunda məruzə etmişdir. Qalib Sayılovun məruzəsində görkəmli folklorşünas alim Azad Nəbiyevin araşdırmalarında xalq inanclarının öyrənilməsi təcrübəsindən bəhs edilmişdir.
Dekabrın 18-də konfrans iştirakçıları Universitetlə tanış olmuş, onun kafedralarını və muzeylərini gəzmişlər. Burada təşkil edilmiş tarix-arxeologiya muzeyi, görkəmli başqırd yazıçısı Zeynəb Bişiyevə həsr olunmuş guşə qonaqlarda maraq doğurmuş, Universitetin fəxri qonaqlqrı kitabına ürək sözlərini yazmışlar.
Dekabrın 18-də və 19-da əməkdaşlarımız Başqırdstan Dövlət Universitetinin filologiya fakültəsinin tələbələrinə mühazirə oxumuşlar. Ağaverdi Xəlilin “Folklor və türk xalqları ədəbiyyatı” mövzusundakı mühazirələri Universitetin tələbə və müəllimləri tərəfindən maraqla dinlənilmiş və bu sahədəki əməkdaşlığın gələcəkdə də davam etdirilməsi arzusu ifadə edilmişdir. Qalib Sayılovun “Azərbaycan aşıq sənəti” mövzusundakı məruzəsi tələbələr tərəfindən alqışlarla qarşılanmışdır.
Universitetdə təşkil edilmiş mədəni proqram Universitetin folklor ansamblının çıxışlarından ibarət konsertlə tamamlanmışdır.