2013-cü il martın 20-24-də Quzey Kıbrıs Türk Cümhuriyyətinin Qazımağosa şəhərində XXIV Uluslararası KIBATEK ədəbiyyat şöleni keçiriləcəkdi. Azərbaycandan bir neçə alim də bu beynəlxalq toplantıda iştirak edəcəkdi.
Martın 20-də sübh tezdən Quzey Kıprıs Türk Cümhuriyyətinin sərin havasını ciyər dolusu sinəmizə çəkir, Ağ Dənizin ləpələrinin həzin pıçıltısına qulaq asırdıq. Kıprısa bahar gəlmişdi, hər tərəf yaşıllıq, gül-çiçəklərlə süslənmişdi. On ölkədən 80-ə yaxın qonaq tədbirdə iştirak etmək üçün Kıprısa gəlmişdi.
Açılış törəni martın 21-də səhər saat 09:00-da Doğu Ak Deniz Universitetində başladı. KIBATEK Vakfı Başkanı İsmail Bozkurt, KIBATEK Türkiyə Başkanı Mətin Turan, Doğu Ak Deniz Universiteninin rektoru prof. Dok. Abdullah Öztoprak, DAU-nin Egitim fakültəsinin dekanı prof. doktor Halil İbrahim Yalın və KKTC-nin prezidenti çıxış edərək qonaqları salamladılar və simpoziumum işinə uğurlar dilədilər.

Üç gün davam edən simpoziumda Azərbaycandan olan Bakı Dövlət Universitetinin müəllimi, filologiya üzrə fəlsəfə doktoru Allahverdi Məmmədlinin, AMEA Şərqşünaslıq İnstitutunun elmi işçisi Elmira Məmmədovanın, AMEA Ədəbiyyat İnstitutunun elmi işçisi Jalə İsmayılın və mənim çıxışları maraqla dinləndi.
Martın 22-də simpozium Girnə şəhərində Girnə Amerikan Universitetində davam etdirildi.
Martın 23-də İskele Atatürk Kültür Mərkəzində Kıprıs xalq oyunları göstərisi təşkil edildi.
Ardınca şairlərin Kıprısa və bahara həsr edilmiş şeirlərinin təqdimatı keçirildi.
Azərbaycan şairləri Jalə İsmayıl və Nizami Muradoğlunun oxuduqları şeirlər alqışlarla qarşılandı.
Martın 24-də Kıprısın tarixi yerləri ilə tanışlıqdan sonra vətənə döndük.

Nizami Muradoğlu