AMEA Folklor İnstitutu Elmi Şurasının növbəti iclası keçirilib

Mayın 7-də AMEA Folklor İnstitutu Elmi Şurasının növbəti iclası keçirilib. Tədbiri giriş sözüylə institutun direktoru, filologiya üzrə elmlər doktoru Muxtar İmanov açıb, gündəlikdə duran məsələləri açıqlayıb.
Öncə Şuşanın işğalının 20-ci ili ilə əlaqədar olaraq şəhidlərimizin xatirəsi bir dəqiqəlik sükutla yad olunub.
M.İmanov çıxışında Şuşa itkimizin xalqımızın yaralı yeri olduğunu söyləyib. O, Qarabağa – əzəli yurd yerlərimizə qayıdacağımıza, işğal olunmuş torpaqlarımızın azad olunacağına əminliyini bildirib.
Tarix üzrə fəlsəfə doktoru Xəliyəddin Xəlilli Şuşanın türkruhlu, türkəsilli şəhər olduğunu, buradan neçə-neçə yaradıcı nəsillərin çıxdığını vurğulayıb.
Filologiya üzrə fəlsəfə doktoru Adil Cəmil də təəssüratını bölüşüb, Şuşa mövzusunda şeirini oxuyub.

Elmi işçi Tacir Səmimi çıxışında Azərbaycanın tarixi mədəniyyət mərkəzlərindən biri olan Şuşada abidələrimizin erməniləşdirilməsi vəhşiliyindən danışıb.
Professor Füzuli Bayat Folklor İnstitutunun da təşkilatçısı olduğu, ötən ay Tiflisdə keçirilən konfrans haqqında danışıb.
M.İmanov bugünlərdə Gürcüstan Respublikasının Batumi şəhərində keçirilən elmi tədbirdə iştirakı haqqında ətraflı bilgi verib.
Qeyd edək ki, bu ayın əvvəlində Batumda Qafqaz Universitetlər Birliyinin «Qloballaşan dünyada universitetlərin rolu: Qafqaz örnəyi» adlı II konqresi keçirilib. Tədbirdə respublikamızın bir sıra elm-təhsil müəssisəsinin rəhbərləri təmsil olunublar. Konqresdə elm-təhsil müəssisələri arasında işbirliyinin genişlənməsi və əməkdaşlığa dair bir sıra sənədlər imzalanıb.