“Azərbaycanşünaslığın aktual problemləri” mövzusunda III Beynəlxalq Elmi konfrans başa çatdı

2 may 2012-ci il tarixdə Bakı Slavyan Universitetində “Azərbaycanşünaslığın aktual problemləri” mövzusunda III Beynəlxalq elmi konfrans öz işinə başladı.
Öncə ümummilli lider Heydər Əliyevin xatirəsi bir dəqiqəlik sükutla yad edildi. Konfransı giriş sözü ilə AMEA Humanitar və İctimai Elmlər Bölməsinin akademik-katibi, Bakı Slavyan Universitetinin rektoru, AMEA-nın müxbir üzvü Kamal Abdullayev açdı. Konfransın beynəlxalq əhəmiyyətini qeyd edərək, onun ümummilli lider Heydər Əliyevin anadan olmasının 89-cu ildönümünə həsr olunduğunu bildirdi.
Kamal Abdullayev konfransın Azərbaycanşünaslıq ideyalarının elmi istiqamət kimi öyrənilməsi və mənimsənilməsi, xarici ölkələrin univesitetlərində fəaliyyət göstərən Azərbaycanşünaslıq tədris və mədəniyyət mərkəzlərinin fəaliyyətinin gücləndirilməsi, Azərbaycanşünaslığın inkişafı, təbliği və tədqiqi, müxtəlif ölkələrdən olan azərbaycanşünasların bir yerə toplanması və Azərbaycanın dünya ölkələri sırasında layiqli yer tutmasında bu insanların elmi potensialı, xaricdə fəaliyyət göstərən Azərbaycan diaspor təşkilatları ilə əlaqələrin möhkəmləndirilməsinə dəstək məqsədilə təşkil olunduğunu qeyd etdi.
Eləcə də konfransın açılışında iştirak edən AR təhsil nazirinin müavini, hüquq üzrə fəlsəfə doktoru Qulu Novruzov, Yunanıstanın Azərbaycandakı səfiri İ.Metaksas, Ukrayna Respublikasının Azərbaycandakı səfiri A.Mişenko, Moskva Dövlət Linqvistik Universitetinin professoru A.Bondarev, Türkiyənin Balıkesir Universitetinin professoru Ali Duymaz, AMEA Şərqşünaslıq İnstitutunun direktoru, professor G.Baxşəliyeva, AMEA Fəlsəfə, Sosiologiya və Hüquq İnstitutunun direktoru, professor İ.Məmmədzadə və başqaları konfransın keçirilməsinin önəmini qeyd etdilər, onun işinə uğurlar arzuladılar.

Xatırladaq Konfransda Rusiya, Ukrayna, Türkiyə, Çexiya, Qazaxıstan, Almaniya, Gürcüstan, Litva, İran, Misir, Polşa da daxil olmaqla dünyanın 11 ölkəsindən elm xadimləri iştirak edir. Ümumiyyətlə, konfransda təmsil olunmaq üçün 46 xarici ölkədən 200-dən çox mütəxəssis məqalə göndərmişdir. Ölkəmizi isə bu beynəlxalq toplantıda AMEA-nın Folklor İnstitutu, İ.Nəsimi adına Dilçilik İnstitutu, N.Gəncəvi adına Ədəbiyyat İnstitutu, M.Füzuli adına Əlyazmalar İnstitutu, Fəlsəfə, Sosiologiya və Hüquq İnstitutu, Arxeologiya və Etnoqrafiya İnstitutu, Tarix İnstitutu, Memarlıq və İncəsənət İnstitutu, İqtisadiyyat İnstitutu, AMEA-nın Naxçıvan bölməsi, Bakı Dövlət Universiteti, Azərbaycan Dillər İnstitutu, Gəncə Dövlət Universiteti, Lənkəran Dövlət Universiteti, Azərbaycan Tibb Universiteti, Azərbaycan Dövlət Mədəniyyət və İncəsənət Universiteti, Azərbaycan Milli Konservatoriyası, Bakı Musiqi Akademiyası, Azərbaycan Dövlət İqtisad Universiteti, Azərbaycan Müəllimlər İnstitutu, Bakı Biznes Universiteti, Naxçıvan Dövlət Universiteti, Naxçıvan Özəl Universitetinin nümayəndələri təmsil edirdi.
May ayının 2-də konfrans çərçivəsində müasir rus yazıçısı B.T.Yevseyevin BSU-nun Filologiya fakültəsinin tələbləri üçün ustad dərsləri və Rusiyanın tanınmış tənqidçi, yazıçı, publisist və ədəbiyyatşünası L.A.Aninskinin Bakı Slavyan Universitetinin “Tərcümə problemləri” elmi-tədqiqat laboratoriyasında həyata keçirilən “Filoloqun kitabxanası - 100” layihəsi çərçivəsində tərcümə olunmuş “Ceviz ləpəsi” («Ядро ореха») kitabının təqdimat mərasimi oldu. Professor M.Qocayev və yazıçı E.Başkeçidin tərcümə etdikləri kitabı iştirakçılara B.T.Yevseyev təqdim etdi. Mərasimdə bir sıra tanınmış şəxslərlə yanaşı, Milli Məclisin deputatı Elmira Axundova da iştirak edirdi.
3 may tarixində konfrans öz işini Novxanı qəsəbəsində yerləşən “Akva-Park” otelində davam etdi. Konfransa xaricdən qatılmış qonaqların 4 may tarixində Şamaxı şəhərinə səfəri və Şamaxıda yerləşən Heydər Əliyev Muzeyi, Diyarşünaslıq muzeyi, M.Ə.Sabirin ev muzeyi, Astrofizika Rəsədxanası və başqa görməli yerlərlə tanışlığı oldu.
4 mayda konfrans öz işini 6 bölmədə - “Heydər Əliyev və azərbaycançılıq ideyası”, “Dilçiliyin aktual problemləri”, “Ədəbiyyatşünaslığın aktual problemləri”, “Fəlsəfə və mədəniyyətşünaslığın aktual problemləri”, “Beynəlxalq münasibətlər”, “Tarix, iqtisadiyyat və hüquq” –
davam etdirdi.