AMEA Folklor İnstitutu Elmi Şurasının növbəti iclası keçirilib

Fevralın 20-də AMEA Folklor İnstitutu Elmi Şurasının növbəti iclası keçirilib. İclası giriş sözüylə institutun direktoru, filologiya üzrə elmlər doktoru Muxtar İmanov açıb, iclasın gündəliyi haqqında məlumat verib.
AMEA Folklor İnstitutu əməkdaşlarının attestasiyasının yekunları barədə Attestasiya Komissiyasının sədri filologiya üzrə elmlər doktoru Füzuli Gözəlov məlumat verib.
«Novruzla bağlı elmi seminar və Qorqudşünaslığın 200 illiyi ilə bağlı hazırlıq tədbirləri barədə» məsələ müzakirə edidikdən sonra qərara alınıb ki, Novruz çərşənbələri və Novruz bayramı ilə bağlı seminar təşkil olunsun.

2015-ci ildə F.Dits tərəfindən «Kitabi-Dədə Qorqud»un elm aləminə təqdim olunmasının 200 ili tamam olur. Qərara alınıb ki, bu barədə hazırlıq tədbirlərinin görülməsi institutun iş planına daxil edilsin, bu ilin aprelində keçiriləcək Respublika «Dədə Qorqud günü» F.Ditsin xatirəsinə həsr olunsun, «Dədə Qorqud» jurnalında bu mövzuda yazılar dərc olunsun.
İclasda habelə 2011-ci ildə AMEA Folklor İnstitutunun doktoranturasına qəbul olunmuş doktorantların fərdi iş planları müzakirə edilərək təsdiq olunub.
«Cari məsələlər»də «Ölü dillər üzrə mütəxəssislərin hazırlanması barədə», «Fəlsəfə doktoru Adil Cəmilə dosent elmi adının verilməsi barədə», «Azərbaycan-Polşa diplomatik əlaqələrinin 540 illiyi ilə bağlı iş planına dair təkliflər» müzakirə edilib.