Foklor İnstitutu və “İrs” folklor ansamblı Novruz tədbirlərinə hazırlaşır
Qarşıdan xalqımızın ən qədim gələnəklərini özündə ehtiva etdirən qədim türk bayramı – Novruz gəlir. Hər il olduğu kimi, AMEA-nın Foklor İnstitutunda Hüseyn İsmayılovun rəhbərliyi ilə xalqımızın bu möhtəşəm bayramını qeyd etmək üçün müxtəlif tədbirlər hazırlanır. Belə ki, Foklor İnstitutu milli-mənəvi dəyərlərin daşıyıcısı və qoruyucusu olmaqla qədim adət və ənənələrin klassik formada xalqa çatdırılması və şüurlarda yenidən bərpası üçün Novruz bayramının keçirilməsi ilə bağlı işlər görməkdədir. Bəlli səbəblərlə əlaqədar olaraq bu gün xalqların milli-mənəvi dəyərlərinin yad ünsürlərlə aşınmasının getdiyi bir zamanda xalqa məxsus olanların xalqa qaytarılması çox vacib bir məsələdir. Bunu nəzərə alan Folklor İnstitutunun rəhbərliyi Novruz bayramı və bu bayramla bağlı olan bütün cizgiləri əks etdirən tədbirin təşkil olunmasını qərara alıb. Belə ki, hər il olduğu kimi, bu il də İlaxır çərşənbə günündə keçirilən tədbirin bütün element və detallarını özündə birləşdirən tamaşa-kompazisiyanın təqdim olunması nəzərədə tutulur.
“İrs” folklor ansamblının kollektivi Novruz bayramına xas olan Kosa, Keçəl kimi obrazların canlandırılması, tonqal ətrafında təşkil olunan mərasimin səhnələşdirilməsi üçün xüsusi işlər görməkdədir. Təsadüfi deyildir ki, ölkəmizdə Novruz bayramının səhnələşdirilərək xalqa təqdim olunması işi də “İrs” foklor ansamblının ifasında olacaq.
Novruz bayramının bütün incəliklərini geniş xalq kütlələrinə çatdırmaq üçün Foklor İnstitutunda keçiriləcək mərasimin lentə alınaraq televiziya və radio ilə də təqdim olunması gözlənilir. AMEA-nın Folklor İnstitutunun Mətbuat Katibi Hikmət Quliyev
|