Türkiyənin məşhur türkoloqları Folklor İnstitutu Elmi Şurasında çıxış ediblər

   
   Noyabrın 16-da Folklor İnstitutu Elmi Şurasının növbəti iclası keçirilib. İclası giriş sözüylə İnstitutun direktoru, AMEA-nın müxbir üzvü Muxtar Kazımoğlu-İmanov açaraq İstanbul Universitetinin Türk dili və ədəbiyyatı bölümü başqanı, Prof. Dr. Osman Fikri Sərtqaya və Türk Dünyası Araşdırmaları Mərkəzinin direktoru, Prof. Dr. Fikrət Türkmənin İnstitutun qonağı olduqlarını və bugünki Elmi Şurada iştirak etdiklərini bildirib. Muxtar İmanov Folklor İnstututu əməkdaşlarının bu iki böyük ziyalının zəngin elmi yaradıcılığı ilə yaxından tanış olduqlarını, onları tez-tez Azərbaycanda keçirilən beynəlxalq simpoziumlarda görməkdən məmnunluq duyduqlarını vurğulayıb, hər iki alimin yaradıcılığı haqqında fikirlərini bölüşüb.

  Sonra Prof. Dr. Fikrət Türkmən “Xalq gülüşü ilə bağlı tədqiqatların nəzəri istiqamətləri” mövzusunda geniş məruzə edib. O, məruzəsində Azərbaycanda gülüş mədəniyyəti ilə bağlı tədqiqatlara da diqqət çəkib, M.Kazımoğlu – İmanovun xalq gülüşü ilə bağlı apardığı araşdırmaları yüksək dəyərləndirib.

  Prof. Dr. Orxan Fikri Sərtqaya Azərbaycana sovet dönəmində gəlişində xalqlarımız arasında yaradılan maneələrin şahidi olduğunu, bu gün artıq belə halların çoxdan arxada qaldığını bildirib, türkologiyanın problemləri haqqında fikirlərini bölüşüb.

  Qonaqlar Elmi Şura üzvləri və iştirakçıların suallarını cavablandırıblar.
M.Kazımoğlu – İmanov qonaqlara vaxt tapıb instituta gəldiklərinə görə təşəkkürünü bildirib, İstitutun nəşrlərini onlara hədiyyə edib.