FOLKLOR İNSTİTUTUNUN ƏMƏKDAŞLARI “İPƏK YOLUNUN YÜKSƏLİŞİ” SİMPOZİUMUNDA İŞTİRAK EDİBLƏR

    Mart ayının 2-dən 7-dək Türkiyənin paytaxtı Ankara şəhərində “İpək yolunun yüksəlişi və türk dünyası bilgi şöləni” adlı beynəlxalq simpozium keçirilib. Simpoziumu Türk Ocaqları Təşkilatı və “Yurd bilgisi” jurnalı təşkil edib. Tədbirin məqsədi türk dünyasının elmi-mədəni əlaqələrini gücləndirmək, ortaq mədəniyyəti öyrənmək, maddi və mənəvi dəyərləri təsbit etmək, onların gələcək nəsillərə itkisiz və zədəsiz çatdırılması yollarını müəyyənləşdirməkdən ibarət olub.

  Simpoziumun açılışı və iclasları Ankara Milli Kitabxanasının binasında gerçəkləşdirilib. Simpoziumda AMEA Folklor İnstitutunun Mərasim folkloru şöbəsinin müdiri, fil.ü.f.d. Ağaverdi Xəlil “Türk dastanlarında İpək yolunun izləri və karvan motivi”, elmi işçi, fil.ü.f.d. Aynur Qəzənfərqızı “Kumuk mədəniyyətinin inkişafında və Dağıstandakı xalqlara təsirində İpək yolunun əhəmiyyəti” adlı məruzə ilə çıxış ediblər.

    Məruzələrin “İpək yolu” adlı məcmuədə nəşri nəzərdə tutulub. Türkiyə ilə yanaşı İrandan, Qzaxıstandan, Özbəkistandan, Tatarstandan, Kırımdan 100-dən çox alimin qatıldığı tədbirdə Azərbaycandan bir qrup elm adamı iştirak edib. Professor Səlahəddin Xəlil, Əbülfəz Süleymanlı, Peterburqlu soydaşımız Mahir Bayramov və başqalarının məruzələri yaddaqalan olub.